بلاد الشوك
كانت بلادي
كانت خيمتي و دواري
رافدة همي و ساترة عاري
فيها مْدْزيَّة
على نفخة عدويا و دل جاري
هاديك بلاد الشوك
ماها من السما مݣطْرْ
زهر صافي
و عسلها فالݣدور وافي
كانت جنة القْصور
و المسك سارح فيها بخور
قبل لا ضربها
الجايحة الكحلة
ضربت العدو لݣفا على غفلة
بعدما الروح تْكَّاتْ
و على ضو الشمعة شَهْدات
نْحَرها الطاعون
و كيّْتها فالمطفية تكلمات
بلاد الشوك
كانت سلطانة
بقميص و حناني وكحل من الحْيَا
وسط دوِيريَّةمْسيْجَة بالضٌَرْيا
هاديك بلاد الشوك
مرسم حار بالولاد و الاوتاد
يا الوالي يا القايد يا الفقيه الحكمة
راني طامعةو من فُمِّي ليك حيدت اللُݣمة
أرى يْديك نتحَزمو و نسُرُّو
الهم فالرُزْمة
راني خاوِيتْ الݣَمْرة فالمنام
هي تشوف و انا نشوف
حتى شفت السواݣي سايحة
حليب و ما
هي تشوف و انا نشوف
حتى شفت شعبان
مكَحْل العْيون و الحْجْبان هْلال
و مْشَبْر فشجرة عالية
بخال و خُلخَال
هي تشوف وانا نشوف
حتى شفت بلادي
بارزة و مْزَنْݣة بالخير و الحشمة
بارزة وسط الحكيم
و الشيخ و العْيَان
بخاتم و نبالة و مضمَّة
يا الوالي يا القايد يا فقيه الحكمة
خير و سلام بلادي حَرݣتْ الشوك
و حَوْضْت عالكرمة
يا الوالي يا القايد يا فقيه الحكمة
خير و سلام بلادي غَرْقْت قبر
فروضة منسيَّة
و بلا صلا بلا ضمَّانْ
ردَّات التراب عالطاعون بالعسريَّة
و سيْجاتو بسْطَارة
من شيح و شقوف
و على شاهدو ردمات الخوف
يا الوالي يا القايد يا الفقيه مول الحكمة
بلادي وقفات الخزانة
وصيفات بالرزانة
و بردات الجوف
